پاک آئی ڈی ایپ سے یونین کونسل میں نکاح کا اندراج کیسےکروائیں
پاکستان میں نکاح ایک نہایت اہم قانونی, مذہبی اور سماجی معاہدہ ہے، جس کا درست اور بروقت اندراج نہ صرف مذہبی بلکہ قانونی اعتبار سے بھی ضروری ہوتا ہے۔ ماضی میں نکاح کا اندراج ایک پیچیدہ اور وقت طلب عمل سمجھا جاتا تھا، جس میں یونین کونسل کے متعدد چکر لگانے پڑتے تھے۔ اب نادرا نے پاک آئی ڈی موبائل ایپ کے ذریعے اس عمل کو جدید، آسان اور شفاف بنا دیا ہے۔ ہم اس آرٹیکل میں پاک آئی ڈی ایپ کے ذریعے نکاح کے اندراج کا مکمل، مرحلہ وار اور تفصیلی طریقہ بیان کر رہے ہیں تاکہ عام شہری بغیر کسی پریشانی کے گھر بیٹھے نکاح کا اندراج کروا سکیں۔
یہ رہنمائی ان تمام افراد کے لیے مفید ہے جو اپنی شادی کو قانونی حیثیت دینا چاہتے ہیں، میرج سرٹیفکیٹ حاصل کرنا چاہتے ہیں یا مستقبل میں فیملی رجسٹریشن، بچوں کی رجسٹریشن، ویزا یا دیگر سرکاری امور میں کسی مشکل سے بچنا چاہتے ہیں۔
پاک آئی ڈی ایپ کیا ہے اور نکاح کے اندراج میں اس کا کردار؟
پاک آئی ڈی ایپ نادرا کا سرکاری ڈیجیٹل پلیٹ فارم ہے جو شہریوں کو شناخت اور سول رجسٹریشن سے متعلق متعدد سہولیات فراہم کرتا ہے۔ اسی ایپ کے ذریعے اب نکاح کا اندراج بھی ممکن بنا دیا گیا ہے۔ اس سہولت کا مقصد یہ ہے کہ شہری یونین کونسل کے دفتری مراحل، طویل انتظار اور غیر ضروری تاخیر سے بچ سکیں اور ایک ہی ڈیجیٹل نظام کے تحت اپنی درخواست جمع کروا سکیں۔
پاک آئی ڈی ایپ کا سب سے بڑا فائدہ یہ ہے کہ درخواست گزار خود اپنی معلومات درج کرتا ہے، دستاویزات اپلوڈ کرتا ہے اور فیس آن لائن ادا کرتا ہے، جس سے غلطیوں اور بدعنوانی کے امکانات کم ہو جاتے ہیں۔
نکاح کے اندراج کے لیے پاک آئی ڈی ایپ کا استعمال کیوں ضروری ہے؟
نکاح کا وقت پر قانونی اندراج مستقبل میں بے شمار مسائل سے بچاتا ہے۔ اگر نکاح یونین کونسل میں رجسٹرڈ نہ ہو تو نادرا ریکارڈ، فیملی رجسٹریشن سرٹیفکیٹ، بچوں کے ب فارم اور دیگر اہم دستاویزات میں مشکلات پیدا ہو سکتی ہیں۔ پاک آئی ڈی ایپ کے ذریعے نکاح کے اندراج سے یہ تمام مسائل ایک آسان اور منظم طریقے سے حل ہو جاتے ہیں۔
ہاس کے علاوہ پاک آئی ڈی ایپ کے ذریعے کیا گیا نکاح کا اندراج براہ راست متعلقہ یونین کونسل کے ریکارڈ کا حصہ بنتا ہے، اس لیے اس کی قانونی حیثیت مکمل طور پر تسلیم شدہ ہوتی ہے۔
پاک آئی ڈی موبائل ایپ کے ذریعے یونین کونسل میں نکاح کے اندراج مکمل طریقہ
پہلا مرحلہ – پاک آئی ڈی ایپ ڈاؤن لوڈ اور لاگ اِن
سب سے پہلے اپنے موبائل فون پر پاک آئی ڈی ایپ ڈاؤن لوڈ کریں، اپنا اکاؤنٹ رجسٹر کریں اور لاگ اِن کریں۔ لاگ اِن ہونے کے بعد آپ ایپ کی ہوم اسکرین پر موجود ہوں گے۔
دوسرا مرحلہ – پروونشل سول رجسٹریشن سروسز
لاگ اِن ہونے کے بعد سب سے پہلے پروونشل سول رجسٹریشن سروسز میں متعلقہ صوبہ منتخب کریں اور میریج کے آپشن پر کلک کریں، جہاں نکاح کے اندراج کا عمل شروع ہوتا ہے۔ یہاں درخواست گزار کو اپنی درخواست کی بنیادی تفصیلات فراہم کرنی ہوتی ہیں
یہاں ہم یہ بات واضح کرتے چلیں کہ صوبے کا درست انتخاب بہت اہم ہے کیونکہ فیس اور قوانین صوبائی سطح پر مختلف ہو سکتے ہیں۔
تیسرا مرحلہ – ایپلیکیشن ڈیٹیلز
یہاں ایپلیکیشن ڈیٹیلز کی اسکرین ظاہر ہوگی۔ اس اسکرین پر متعلقہ ضلع، تحصیل اور یونین کونسل منتخب کریں۔ اس کے بعد کیٹیگری اور تاریخِ نکاح منتخب کریں اور رائج صوبائی قوانین کے تحت فیس معلوم کرنے کے لیے کیلکولیٹ فیس کے بٹن پر کلک کریں۔ ایپلیکیشن فیس اسی اسکرین پر ظاہر ہو جائے گی۔
یہ مرحلہ اس لیے اہم ہے کہ تمام ریکارڈ اسی یونین کونسل کے ذریعے محفوظ اور تصدیق شدہ ہوتا ہے۔
چوتھا مرحلہ – اسٹارٹ ایپلیکیشن
ایپلیکیشن فیس ظاہر ہونے کے بعد اسٹارٹ ایپلیکیشن پر کلک کریں تاکہ درخواست کا باقاعدہ عمل شروع ہو سکے۔
پانچواں مرحلہ – ریکوائرڈ ڈاکیومنٹس
اب ریکوائرڈ ڈاکیومنٹس کی اسکرین ظاہر ہوگی۔ ڈاکیومنٹس پر کلک کریں تو مطلوبہ دستاویزات کی فہرست نظر آئے گی۔ جو دستاویز اپلوڈ کرنی ہیں اسے منتخب کریں اور پھر اٹیچ ڈاکیومنٹس پر کلک کریں۔
موبائل سے دستاویز اپلوڈ کرنے کے لیے براؤز پر کلک کریں یا تصویر لینے کے لیے کیپچر پر کلک کریں۔ تصویر لینے کے بعد اپلوڈ پر کلک کریں۔ دستاویز اپلوڈ ہو جائے گی۔ اسی طرح تمام مطلوبہ دستاویزات اپلوڈ کریں اور پھر نیکسٹ پر کلک کریں۔
چھٹا مرحلہ – میاں بیوی اور نکاح خواں کی تفصیلات
اگلی اسکرین پر اگر درخواست گزار شوہر ہے تو بیوی کی تفصیلات درج کریں، اور اگر درخواست گزار بیوی ہے تو شوہر کی تفصیلات درج کریں۔ اسکرین کے آخر میں نکاح خواں کا شناختی کارڈ نمبر درج کریں اور نیکسٹ پر کلک کریں۔ یہ معلومات نکاح کے اندراج کی قانونی تصدیق کے لیے بے حد اہم ہوتی ہیں۔
ساتواں مرحلہ – فیشل ویریفیکیشن
یاد رہے کہ اگر فیشل ویریفیکیشن کامیاب نہ ہو تو فنگر پرنٹس کی تصدیق کرانا ضروری ہوگی۔ اسی بنیاد پر اگلی اسکرین ظاہر ہوگی۔ یہاں فیشل لائیونیس کی اسکرین کھلے گی۔ اگر درخواست گزار شوہر ہے تو بیوی کی تصویر لیں، اور اگر درخواست گزار بیوی ہے تو شوہر کی تصویر لیں۔ تصویر لینے کے لیے فرنٹ یا بیک کیمرہ منتخب کریں۔ تصویر کھینچنے کے بعد اگر کسی ترمیم کی ضرورت نہ ہو تو ڈیفالٹ کا آپشن منتخب کریں۔
کسٹم ریسائز یا کراپ فوٹو کے ذریعے تصویر کو ضرورت کے مطابق ایڈجسٹ کیا جا سکتا ہے۔ سائز 3/4 کے آپشن سے تصویر 3/4 سائز میں سیٹ ہو جائے گی۔ اس کے علاوہ روٹیٹ فوٹو کے ذریعے تصویر سیدھی کی جا سکتی ہے۔ ایڈٹ فوٹو کے ذریعے تصویر کی برائٹنس اور کنٹراسٹ کم یا زیادہ کیا جا سکتا ہے۔
تبدیلیاں محفوظ کرنے کے لیے اوپر موجود ٹِک مارک پر کلک کریں، پھر نیچے سیو کے بٹن پر کلک کریں اور اس کے بعد نیکسٹ پر کلک کریں۔
آٹھواں مرحلہ – ویریفائی فنگر پرنٹس
اب ویریفائی فنگر پرنٹس کی اسکرین کھلے گی۔ دیے گئے طریقۂ کار کے مطابق انگلیوں کی تصدیق کریں اور پھر نیکسٹ پر کلک کریں۔
نواں مرحلہ – ایڈریس ڈیٹیلز
تصویر اور بایومیٹرک تصدیق کے بعد ایڈریس ڈیٹیلز کی اسکرین ظاہر ہوگی۔ یہاں موجودہ یا مستقل پتہ منتخب کریں اور نیکسٹ پر کلک کریں۔
دسواں مرحلہ – پیمنٹ آپشنز
اب پیمنٹ آپشنز کی اسکرین ظاہر ہوگی۔ فیس کی ادائیگی آپ ایزی پیسہ، راست کیو آر کوڈ، ای سہولت، جاز کیش، ڈیبٹ یا کریڈٹ کارڈ کے ذریعے کر سکتے ہیں۔ فیس کی ادائیگی مکمل ہونے کے بعد کنٹینیو پر کلک کریں۔
گیارہواں اور آخری مرحلہ – ریویو انفارمیشن
اس کے بعد ریویو انفارمیشن کی اسکرین آئے گی۔ ریویو فارم پر کلک کریں، فارم ظاہر ہوگا۔ دی گئی معلومات کو اچھی طرح چیک کریں، تمام اکنالجمنٹس پر ٹک مارک کریں اور سبمٹ پر کلک کریں۔ اب ایپلیکیشن کامیابی سے جمع ہو گئی کا پیغام ظاہر ہوگا۔ نادرا آپ کی درخواست کو پراسیس کرے گا اور متعلقہ یونین کونسل میں آپ کے نکاح کا اندراج مکمل ہو جائے گا۔
بعد ازاں نکاح کا اندراج مکمل ہونے کے بعد ہوم اسکرین پر جا کر ایپلیکیشن میں داخل ہوں اور ڈاؤن لوڈ کے آئیکن پر کلک کریں۔ نکاح سرٹیفکیٹ آپ کے آئی ڈی والٹ میں ڈاؤن لوڈ ہو جائے گا۔ یہ ڈیجیٹل نکاح سرٹیفکیٹ قانونی طور پر قابل قبول ہوتا ہے اور مختلف سرکاری و نجی امور میں استعمال کیا جا سکتا ہے۔
پاک آئی ڈی ایپ کے ذریعے نکاح کے اندراج کے فوائد
ہم اگر مجموعی طور پر دیکھیں تو پاک آئی ڈی ایپ کے ذریعے نکاح کا اندراج وقت، محنت اور وسائل کی بچت کرتا ہے۔ شہریوں کو یونین کونسل کے چکر نہیں لگانے پڑتے، تمام مراحل واضح ہوتے ہیں اور ریکارڈ محفوظ رہتا ہے۔ یہ سہولت خاص طور پر ان افراد کے لیے مفید ہے جو مصروف زندگی یا دور دراز علاقوں میں رہتے ہیں۔
حتمی نتیجہ
نکاح کا اندراج ایک اہم قانونی ذمہ داری ہے اور پاک آئی ڈی ایپ نے اسے جدید دور کے تقاضوں کے مطابق آسان بنا دیا ہے۔ ہم سمجھتے ہیں کہ ہر شادی شدہ جوڑے کو چاہیے کہ وہ پاک آئی ڈی ایپ کے ذریعے اپنے نکاح کا اندراج بروقت مکمل کرے تاکہ مستقبل میں کسی قانونی یا انتظامی مسئلے کا سامنا نہ کرنا پڑے۔ نادرا کی یہ ڈیجیٹل سہولت پاکستان میں سول رجسٹریشن کے نظام کو مزید مضبوط اور قابل اعتماد بنا رہی ہے۔
پاک آئی ڈی ایپ پر نکاح کے اندراج سے متعلق اکثر پوچھے جانے والے سوالات
سوال: کیا پاک آئی ڈی ایپ کے ذریعے نکاح کا اندراج قانونی طور پر درست ہوتا ہے؟
جواب: جی ہاں، پاک آئی ڈی ایپ کے ذریعے کیا گیا نکاح کا اندراج نادرا اور متعلقہ یونین کونسل کے ذریعے کیا جاتا ہے، اس لیے یہ مکمل طور پر قانونی اور قابلِ قبول ہوتا ہے۔
سوال: کیا نکاح کے اندراج کے لیے یونین کونسل جانا ضروری ہے؟
جواب: نہیں، پاک آئی ڈی ایپ کے ذریعے آپ گھر بیٹھے نکاح کا اندراج کر سکتے ہیں۔ البتہ بعض کیسز میں یونین کونسل اضافی تصدیق کے لیے طلب کر سکتی ہے۔
سوال: نکاح کے اندراج کے لیے کون کون سے دستاویزات درکار ہوتے ہیں؟
جواب: عام طور پر میاں بیوی کے شناختی کارڈ، نکاح نامہ، گواہوں کے شناختی کارڈ اور نکاح خواں کا شناختی کارڈ نمبر درکار ہوتا ہے۔ ایپ میں مکمل فہرست واضح طور پر دکھا دی جاتی ہے۔
سوال: نکاح کے اندراج کی فیس کتنی ہوتی ہے؟
جواب: فیس صوبے، ضلع اور یونین کونسل کے مطابق مختلف ہو سکتی ہے۔ درست فیس ایپلیکیشن ڈیٹیلز اسکرین پر کیلکولیٹ فیس کے بٹن پر کلک کرنے سے ظاہر ہو جاتی ہے۔ فیس ایزی پیسہ، جاز کیش، راست کیو آر کوڈ، ای سہولت، ڈیبٹ کارڈ یا کریڈٹ کارڈ کے ذریعے ادا کی جا سکتی ہے
سوال: نکاح سرٹیفکیٹ کب اور کہاں سے ملتا ہے؟
جواب: درخواست مکمل ہونے اور پراسیس کے بعد نکاح سرٹیفکیٹ پاک آئی ڈی ایپ کے آئی ڈی والٹ میں دستیاب ہو جاتا ہے، جہاں سے اسے ڈاؤن لوڈ کیا جا سکتا ہے۔
سوال: اگر معلومات غلط درج ہو جائیں تو کیا ترمیم ممکن ہے؟
جواب: درخواست جمع کروانے سے پہلے ریویو فارم میں معلومات درست کی جا سکتی ہیں۔ اگر درخواست جمع ہو چکی ہو تو متعلقہ یونین کونسل سے رجوع کرنا ہوگا۔
Also Read English Version: How to Update Marital Status in NADRA: The Ultimate Guide